Soneto pri io skribinda
sunleviĝojn kaj sunsubirojn 
oni jam tre ofte priskribis 
kaj diversaj aŭroroj gibis 
elvokante grandegajn mirojn 

mi skribi pri tio ne volas 
eĉ se mi akceptas belecon 
kaj natureman kortuŝecon 
ĉar kun nostalgio mi solas 

mi interesiĝas pri homo 
pri lia ĝojo kaj tristeco 
pri lia saĝa aksiomo 

pri esperoj kaj disreviĝoj 
pri rezigno kaj insisteco 
pri homaj faloj kaj leviĝoj
Zuriko, la 18an de aprilo 2000